Take a fresh look at your lifestyle.

രഹ്ന ഫാത്തിമയെ അനുകൂലിച്ച് പ്രാവര്‍ത്തികമാക്കാന്‍ ആരുണ്ട്‌?

8

ലിസ് ലോന

നഗ്‌നമേനിയിലെ ചിത്രം വരയൊക്കെ അടിപൊളിയാണ് വിദേശികളൊക്കെ ചെയ്യുന്നതല്ലേ എന്താ കുഴപ്പം?  ജനിച്ചപ്പോള്‍ മുതല്‍ കുഞ്ഞു കണ്ട അമ്മിഞ്ഞ തന്നെ അല്ലേ ഇപ്പോഴും കാണുന്നത്..അമ്മയുടെ അമ്മിഞ്ഞ മകന്‍ കണ്ടാലൊരു ലൈംഗികതയുമില്ല.

എന്റെ അഭിപ്രായത്തില്‍ ആ ട്രൗസര്‍ കൂടി ഒഴിവാക്കി കൊടുക്കണമായിരുന്നു അതും ലൈംഗികാവയവമെന്ന കാറ്റഗറിയില്‍ പെടുന്നതല്ലേ മാത്രമല്ല ജനിച്ച വഴി മക്കള്‍ കൂടി അറിഞ്ഞു വളരട്ടെ..അപ്പോഴല്ലേ വിചാരിച്ച ആശയത്തിന് പൂര്‍ണതയുള്ളൂ.

അനുകൂലിക്കുന്നത് കൊള്ളാം ഇതെല്ലാം അനുകരിച്ച് പ്രാവര്‍ത്തികമാക്കി അവരുടെ കൂടെ നില്‍ക്കാന്‍ ആരൊക്കെയുണ്ട്.

ഫേസ്ബുക്കിലെ പോസ്റ്റിലും വാക്കിലും മാത്രമല്ലാതെ നിങ്ങളിലെത്ര പേര് ജീവിതത്തിലും ഈ പുരോഗമന നഗ്‌നതാപ്രദര്‍ശനമെന്ന മഹത്തായ ആശയം സ്വന്തം വീട്ടിലും കൊടുത്ത് ഫേസ്ബുക്കില്‍ കൊടുത്ത ‘സപ്പോട്ടക്ക് ‘ പിന്തുണ നല്‍കുമെന്ന് പറയണം.

•നാളെ നിങ്ങളുടെ മകന്‍ ചിത്രം വരയ്ക്കാന്‍ ക്യാന്‍വാസിനായി നിങ്ങളുടെ ശരീരം ചോദിക്കുമ്പോള്‍ പിറന്നപടി കിടന്നു കൊടുക്കുമോ ?

•വേറൊരാള്‍ക്ക് മുന്‍പില്‍ മകനെയോ മകളെയോ ക്യാന്‍വാസ് ആയി കിടക്കാന്‍ അനുവദിക്കുമോ?

•സ്ത്രീയുടെ ശരീരം മാത്രമല്ല പുരുഷന്റെ ശരീരവും ഈ അറിവില്‍ പ്രധാനമാണെന്നിരിക്കെ ലൈംഗിക വിദ്യാഭ്യാസം നല്കാന്‍ മകള്‍ക്ക് മുന്‍പില്‍ അച്ഛനോട് കിടന്നുകൊടുക്കണമെന്നു പറയാന്‍ നിങ്ങളില്‍ എത്ര പേര് തയ്യാറാകും?

•അച്ഛനും അമ്മയും ശാരീരിക ബന്ധത്തിലേര്‍പ്പെടുമ്പോള്‍ ഉണ്ടാകുന്ന ചെറിയ ശബ്ദം പോലും ചെവിയോര്‍ത്ത് ശ്രദ്ധിക്കുന്ന കുഞ്ഞുമക്കളെ മാറ്റികിടത്താതെ ലൈംഗിക അറിവ് പകരാന്‍ നിങ്ങളില്‍ എത്ര പേര് അവരെ കൂടെ കിടത്തും??

•കുഞ്ഞുങ്ങളെ മുലയൂട്ടുന്നതുകൊണ്ട് ഞാന്‍ വീട്ടില്‍ മേല്‍വസ്ത്രം ധരിക്കാറില്ലെന്ന് പറയുന്നവര്‍ മറ്റുള്ളവര്‍ വീട്ടിലെത്തുമ്പോള്‍ അങ്ങനെ തന്നെ ആണോ പുറത്തേക്ക് ചെല്ലാറുള്ളത്.

•നാളെ കൂടെപഠിക്കുന്നവരോടോ ടീച്ചറോടോ അല്ലെങ്കില്‍ ഏതെങ്കിലുമൊരു അന്യസ്ത്രീയോടോ എന്റമ്മ ഇതൊക്കെ എനിക്ക് കാണിച്ചുതരുന്നതാണെന്നും ലൈംഗികത തലപോകുന്ന വിഷയമല്ലെന്നും ആര്‍ക്ക് മുന്‍പിലും എങ്ങനെ വേണമെങ്കിലും എപ്പോള്‍ വേണമെങ്കിലും നില്‍ക്കാമെന്നും ചെറുപ്രായത്തില്‍ ധൈര്യസമേതം പറയാന്‍ മകനെ പ്രാപ്തനാക്കുന്ന ഗവേഷണത്തില്‍ നിങ്ങള്‍ ആരൊക്കെ ആത്മാര്‍ഥമായി പങ്കെടുക്കും?
ഏറ്റവും പ്രധാനമായി..

‘• സാമൂഹികഅവബോധത്തിനായി ഈ ആശയത്തിലൂടെ ഒരു വീഡിയോ പിടിച്ച് എത്രപേര്‍ മറ്റുള്ളവര്‍ക്ക് കണ്ടുപഠിക്കാനായി സോഷ്യല്‍മീഡിയയില്‍ പോസ്റ്റും? ‘

ഇത്തരത്തില്‍ വളര്‍ന്നുവരുന്ന മക്കള്‍ക്ക് കിട്ടുന്ന അറിവ് ശരിയായ ദിശയില്‍ തന്നെയാണ് എത്തിയതെന്നും നിങ്ങളുടെ ഭര്‍ത്താവോ അച്ഛനോ മകനോ അന്യസ്ത്രീകളെ ബഹുമാനിക്കുന്നത് അവരുടെ അമ്മമാരുടെ നഗ്‌നശരീരം കണ്ടുവളര്‍ന്നിട്ടാണോ എന്ന് കൂടി ആലോചിക്കണം..

അര്‍ദ്ധനഗ്‌നശരീരത്തില്‍ ചിത്രം വരക്കാന്‍ മകനെ പഠിപ്പിക്കുന്ന ഒരമ്മക്കെതിരെ മാത്രമല്ല ഷര്‍ട്ടിടാത്ത അച്ഛന്മാര്‍ക്ക് എതിരെയും കേസ് കൊടുക്കണമെന്ന് കമെന്റുകള്‍ കണ്ടു.. മാറ് മറക്കാന്‍ സമരം നടത്തിയത് സ്ത്രീകള്‍ക്ക് വേണ്ടി ആയിരുന്നില്ലേ അന്നെന്ത് കൊണ്ട് പുരുഷന്മാരും മറയ്ക്കണമെന്ന് ആരും നിര്‍ബന്ധം പിടിച്ചില്ല.

അമ്മയിലെ മുല തന്നെയാണ് ഭാര്യയ്ക്കും മകള്‍ക്കും പെങ്ങള്‍ക്കും ഉള്ളത് എന്ന് കരുതി മുലയൂട്ടുന്ന ഒരു അമ്മയെ നോക്കി പെങ്ങളോടും മകളോടും ഇനിമുതല്‍ മേല്‍വസ്ത്രം ഇട്ടില്ലെങ്കിലും കുഴപ്പമില്ലെന്ന് ആരും പറയാറില്ല കാരണം മുലയെന്നത് സാധാരണ അവയവമല്ലെന്നും വ്യക്തിയും സാഹചര്യവും മാറിവരുമ്പോള്‍ ലൈംഗികതയില്‍ അതിന് പങ്കുണ്ടെന്നും എല്ലാവര്‍ക്കും അറിയാം..

ഇന്നലെകളില്‍ പീരിയഡ്സും പാഡുമൊക്കെ അശ്ലീലവും അറപ്പുമൊക്കെ ആയിരുന്നു ഇന്നത് ഒരുപാട് ആണ്‍മക്കള്‍ എന്താണെന്ന് അറിഞ്ഞുവളരുന്നത് ചോര കിനിയുന്ന നാപ്കിനും അത് വരുന്നവഴിയും മക്കള്‍ക്ക് മുന്‍പില്‍ അമ്മമാര്‍ പ്രദര്‍ശിപ്പിച്ചല്ല..അതുപോലെ ഈ അറിവ് പകരാനും എത്രയോ വഴികളുണ്ട് .

അമ്മയുടെ മുല കണ്ടതുകൊണ്ട് മകന് ഒന്നും തോന്നില്ല അതിന് തെളിവുകളായി തളര്‍ന്നുവീണുപോയ അമ്മയെ ശുശ്രുഷിക്കുന്ന ആണ്‍മക്കളെ ഞാന്‍ കണ്ടിട്ടുണ്ട് ആ കണ്ണുകളില്‍ നഗ്‌നതയോടുള്ള ആര്‍ത്തി ഞാന്‍ കണ്ടിട്ടില്ല..

പക്ഷേ ഇത് സോഷ്യല്‍ മീഡിയ വഴി പബ്ലിഷ് ചെയ്ത് ആശയം പടര്‍ത്താന്‍ ശ്രമിച്ചവര്‍ക്ക് നഗ്നതാപ്രദര്‍ശനമെന്ന കടുത്ത മാനസികരോഗമുണ്ടെന്നാണ് എനിക്ക് തോന്നിയത്..
വഴിവക്കില്‍ നിന്ന് തുണി പൊക്കികാണിക്കുന്നവരുടെ മനോഭാവം പോലെ ആരെങ്കിലുമൊക്കെ കണ്ടാല്‍ കിട്ടുന്ന ഒരു മനസുഖം.. കൂടെ പണവും.

പറയാനുള്ള കാരണം യൂട്യൂബില്‍ പുള്ളിക്കാരിയുടെ വീഡിയോയില്‍ ടോപ്ലെസ് കാഴ്ച സ്ഥിരം സംഭവം ആണ് ഇറക്കംകുറഞ്ഞ വസ്ത്രം , നഗ്‌നത ഇതൊക്കെ സ്ഥിരം കാഴ്ചക്കാര്‍ക്ക് അനുഭൂതിയുണ്ടാക്കി അവിടെയുണ്ട്.

വീഡിയോ എടുക്കുന്നവന്‍ ശ്രദ്ധിക്കുന്നതും മുന്‍ഗണന നല്‍കുന്നതും അവരുടെ ചാളകറി വെക്കുന്നതിലല്ല നഗ്നശരീരത്തില്‍ ആണ് ..അതില്‍ തന്നെ വ്യക്തമാണ് കാണാന്‍ വരുന്നതില്‍ ഭൂരിഭാഗവും അവരുടെ ശരീരം കാണാന്‍ വരുന്നവരാണെന്ന ബോധ്യം വീഡിയോഗ്രാഫര്‍ക്കും അവര്‍ക്കും ഉണ്ടെന്ന് അതിനെ വ്യൂസും പൈസയുമാക്കി മാറ്റാന്‍ അവര്‍ തീരുമാനിക്കുകയും ചെയ്തു.

രാത്രി ഉറങ്ങും മുന്‍പ് വീഡിയോ രഹസ്യമായി കാണുന്ന സദാചാരക്കാരും അമ്മയുടെ മുല കണ്ടാല്‍ മകന് എന്ത് തോന്നാന്‍ എന്ന് അനുകൂലിക്കുന്നവരും വീഡിയോ മുഴുവന്‍ കണ്ട് വൈറല്‍ ആക്കി.

നാളെ മക്കള്‍ക്ക് മുന്‍പില്‍ ശാരീരിക ബന്ധത്തിലേര്‍പ്പെടുമ്പോഴുള്ള വീഡിയോ അവര്‍ മറ്റുള്ളവര്‍ക്ക് വിജ്ഞാനപ്രദമായി പോസ്റ്റിയാലും നമ്മള്‍ വൈറല്‍ ആക്കും ..ആക്കണം.കാരണം നമ്മുടെ മക്കള്‍ക്ക് കിട്ടുന്ന അറിവിനേക്കാളും അവരുടെ കഞ്ഞികുടി പ്രശ്‌നമാണ്.
കുഞ്ഞിനെ വച്ചുള്ള ചൂണ്ടയില്‍ എല്ലാവരും പോയി അന്തസ്സായി കൊത്തി അതില്‍ കൂടുതല്‍ പ്രത്യേകതയൊന്നും ഈ പുരോഗമനവാദത്തിന് ഇല്ലെന്നാണ് എനിക്ക് തോന്നിയത്.
നാളെ ഇതിന്റെ പേരില്‍ എന്നും നിന്റെ വീട്ടില്‍ ഇതൊക്കെത്തന്നെ അല്ലേയെന്ന് ആ കുഞ്ഞ് അപമാനിക്കപ്പെടില്ലയെന്നും വേറൊരു ദിശയിലേക്ക് ആ മകന്റെ ചിന്താഗതികള്‍ മാറില്ലയെന്നും പ്രതീക്ഷിക്കാം അല്ലേ

പതിനെട്ട് വയസ്സെന്ന പ്രായപരിധി വെറുതെയല്ലെന്നും അതുകഴിഞ്ഞുള്ള പ്രായത്തിലേ സമ്മതമെന്ന വാക്കിന് പോലും പ്രസക്തിയുള്ളൂവെന്നും വാളയാര്‍ കേസിലെ ഉഭയകക്ഷിസമ്മതപ്രകാരമെന്ന എഫ് ഐ ആറിനെ ശക്തമായി ചോദ്യം ചെയ്തവര്‍ ഈ കുഞ്ഞിന്റെ പ്രായം കാണാത്തതുകൊണ്ടാണോ മറന്നിട്ടോ ആകുമല്ലേ അനുകൂല പോസ്റ്റ് ഇട്ടത് ..
പത്തിരുപത് പട്ടാളക്കാര്‍ മരിച്ചുവീണപ്പോള്‍ ഇത്രെയും കോളിളക്കം ഫേസ്ബുക്കില്‍ ഉണ്ടായില്ലായിരുന്നു.

പക്ഷേ മുഖ്യമന്ത്രിയുടെ മകളുടെ രണ്ടാം വിവാഹമെന്ന സ്വകാര്യത എല്ലാവരും ആഘോഷിച്ചു…
വയനാട്ടില്‍ ഒരു പയ്യനെ കടുവ കടിച്ചുകൊന്ന് ശരീരത്തിന്റെ ബാക്കി മീന്‍ മുള്ള് പോലെ ഇട്ടിട്ട് പോയപ്പോഴും ആരും അറിഞ്ഞില്ല..

പകരം ആന മരിച്ചത് ലോകം മുഴുവന്‍ അറിഞ്ഞിരുന്നു..

അതുപോലൊന്ന് മാത്രമാണ് സോഷ്യല്‍ മീഡിയയിയില്‍ ഇന്നലെമുതലുള്ള ട്രെന്‍ഡ് ചിത്രംവര..
പെണ്‍മക്കള്‍ ആയിട്ട് പോലും കുഞ്ഞുങ്ങള്‍ ഇത്തിരി മുതിര്‍ന്നപ്പോള്‍ ഉടുപ്പ് മാറാന്‍ പോലും മറവ് തേടി പോകുന്ന അത്രയൊന്നും പുരോഗമനമെത്താത്ത കുലസ്ത്രീ അമ്മമാരില്‍ പെട്ട ഒരമ്മയാണ് പോസ്റ്റിട്ടതിന് ക്ഷമിക്കണം.

Leave A Reply

Your email address will not be published.